Йил ҳайратлари! 2013 йил сарҳисоби

Мана, 2013 йилни ҳам кузатиб қўйяпмиз. Аввало, барча футбол ишқибозларини Янги йил билан чин қалбдан муборакбод этамиз. Янги йил учун аталган лойиҳамизнинг махсус сонини эътиборингизга ҳавола қиламиз. Бу ҳақиқатан ҳам “Йил ҳайрати”дир!

Бу сонда 2013 йилни ойма-ой сарҳисоб қиламиз, асосий воқеаларни эслаб ўтамиз. Аввалига жаҳон футболи, кейин ўзбек футболи ҳақида гаплашамиз. Умар Момани чизган расмлар эса сизларга Янги йил совғаси. Демак, бошидан бошлаймиз.

ЯНВАРЬ

Жаҳон футболи: тўртинчи “Олтин тўп”

Январь ойида ҳар йили “Олтин тўп” мукофотини топшириш маросими ўтказилади. 2013 йилда ушбу мукофотни Лионель Месси қўлга киритди ва бу унинг тўртинчи “Олтин тўп”идир.

Шунингдек, бу ойда “Челси”нинг Эден Азар деб аталмиш футболчиси ўйин пайтида коптокни олиб берувчи болани тепгани билан ҳам эсда қолди. Оёғига эмас, орқасига эмас, нақд қорнига тепди-я!

Январдаги “эл-класико”да Рафаэль Варан ажойиб тарзда гол киритди ва янги иқтидор пайдо бўлаётганини билдириб қўйди.

Ўзбек футболи: Қосимов ва Усмоновнинг “орзуси”

Миллий терма жамоамиз бош мураббийи Миржалол Қосимов ой бошидаёқ интервью бериб, “2013 йил омадли келишини тилади”. Ундан кейин ЎФФ президенти Мираброр Усмонов “Ўзбекистон футболининг янги тарихи ёзилиш арафасида” дея интервью берди. “Чучварани хом санаганини” эса кейин билди.

ФЕВРАЛЬ

Жаҳон футболи: ЕЧЛдаги ҳайратларнинг бошланиши

Февралда Нигерия терма жамоаси Африка миллатлар кубогида мутлақ ғолибликни қўлга киритди. Қолаверса, Европа чемпионлар лигаси нимчорак финал дастлабки ўйинларига старт берилди. Кутилмаганидек, “Барселона” сафарда “Милан”га мағлуб бўлди. “Реал” Мадрид ва “МЮ” ўйинида муроса кўчаси танланди.

Ўзбек футболи: ҳаммаси шу ердан бошланди

Бирлашган Араб Амирликларининг Дубай шаҳрида Ўзбекистон ҳамда Озарбойжон терма жамоалари ўртасида ўртоқлик учрашуви ўтказилди ва дарвозаларга гол киритилмади. Балки назорат ўйини учун бу натижа бўлар, лекин бу бошланиши эканини ўшанда ҳеч ким билмасди.

МАРТ

Жаҳон футболи: Жунайд Чақир ва “Барселона”дан “суперҳайрат”

Европа чемпионлар лигаси нимчорак финал жавоб учрашувлари доирасида кутилмаган натижалар қайд этилди. Аввалига “Барса” “Милан”ни тор-мор этди, “Реал” Мадрид “Олд Траффорд”да “МЮ”ни таслим этди. Жунайд Чақирнинг “сеҳрли ҳуштаги”ни ҳеч ким унутмади ҳали. Бу орада “Бавария” кучайиб бораётганига ҳеч ким эътибор бермаганди.

Ўзбек футболи: 30 000 томошабин учун жудаям кичик ҳисоб

Ўзбекистон терма жамоаси “Бунёдкор” стадионида ЖЧ-2014 саралаши доирасида Ливанни қабул қилди ва кичик ҳисобда ғалаба қозонди. Ҳар ҳолда ютди-ку... Бу орада Забиҳилло Ўринбоев деган футболчимиз “Наполи” кўригидан ўтиб келди. Шунчаки ўтиб келди. Фойдаси бўлмади.

АПРЕЛЬ

Жаҳон футболи: “Барса” ва “Реал”нинг “янчилиши”

Ҳозирги кунда сермаҳсуллиги билан ажралиб турган Луис Суарес бир пайтлар тишлашни ҳам жойига қўйган. “Челси” ҳимоячиси Бранислав Ивановични тишлаб олгани анча шов-шув бўлганди.

Европа чемпионлар лигаси ярим финал баҳсларида испан жамоаларига қарши немис жамоалари майдонга тушишди. “Барселона” умумий ҳисобда 0:7, “Реал” 3:4 ҳисобида мағлуб бўлди. Финалга иккита немис жамоаси йўл олди.

Ўзбек футболи: “Жимжитлик”...

МАЙ

Жаҳон футболи: кетганлар ва чемпионлар

“Уиган” “Манчестер Сити”ни ютиб, Англия кубогини қўлга киритди ва Манчинига жавоб берилди. Жейми Каррагер фаолиятини якунлади, Дэвид Бекхем хайрлашув учрашувини ўтказди. Сэр Алекс Фергюсон ҳам истеъфога чиқиб, ўрнига Дэвид Мойесни қўйиб кетди.

“Манчестер Юнайтед” (Англия), “Барселона” (Испания), “Ювентус” (Италия), “ПСЖ” (Франция), “Бавария” (Германия), “Порту” (Португалия) ўз миллий чемпионатларида чемпион бўлишди. Европа лигасида “Челси”, Европа чемпионлар лигасида эса “Бавария” ғалаба қозонди.

Ўзбек футболи: “Жимжитлик” давом этади...

ИЮНЬ

Жаҳон футболи: Неймар аталмиш юлдуз саҳнага чиқди

Бу ойда Бразилияда Конфедерациялар кубоги бўлиб ўтди. Унинг финалида Неймар ўз терма жамоаси ғалабасига катта ҳисса қўшди.

Ўзбек футболи: “музқаймоқхўрлик” орзулигича қолди

Жанубий Кореяга қарши ўйиндаги мағлубиятни эслашга ҳожат йўқ. Лекин футбол ишқибозлари томонидан Ҳожибой Тожибоев расми ва иборалари туширилган футболкалар ишлаб чиқарилгани ҳайратланарли бўлди.

ИЮЛЬ

Жаҳон футболи: “Боруссия” ўчини олди

Дортмунднинг “Боруссия” жамоаси Европа чемпионлар лигасидаги мағлубият ўчини олди, дейиш мумкин. Германия кубоги финалида “Бавария”ни таслим қилди.

Ўзбек футболи: Ўзбекистон – Туркия хаёлий ўйини

Шу ойдан бошлаб Ўзбекистон терма жамоаси Туркия билан августда ўртоқлик учрашувини ўтказиши ҳақида хабарлар тарқалди. Ҳатто унга тайинланган ҳакамлар ҳам эълон қилинди, стадион аниқланди (“Пахтакор”), Туркия таркиби маълум қилинди. Лекин... Бу ёғи кейинги ойда...

АВГУСТ

Жаҳон футболи: Гвардиоланинг Моуриньога аталган “почини”

Пеп Гвардиола қўлостида ҳаракат қила бошлаган “Бавария” УЕФА суперкубоги учун баҳсда Моуриньо бошчилигидаги “Челси”ни мағлуб этди. Шунингдек, Франк Рибери УЕФАнинг энг яхши футболчиси деб топилди.

Ўзбек футболи: Ўзбекистон – Туркия хаёлий ўйини-2

“Пахтакор” стадионида бўлиб ўтиши кутилаётган Туркияга қарши ўртоқлик ўйинини барча кутарди, ҳатто туркияликлар ҳам. Лекин “Ўзбекистон – Туркия ўйини ЎФФ ташаббусига асосан 3 август куни бекор қилинган”ига нима дейсиз?

Бандан ташқари, Асқар Толибжонов деган одам Твиттерга адашиб кириб қолгани ва у ерда бир кун ҳам яшолмаслигини билиб, аккаунтини ўчириб ташлаганини ҳам эслаб ўтайлик.

СЕНТЯБРЬ

Жаҳон футболи: энг қиммат футболчи ва “МЮ”га урилган 4та гол

“Реал” таркибига қўшилган Гарет Бейл футбол тарихидаги энг қиммат футболчига айланди. Месут Ўзил эса трансфернинг сўнгги сонияларида “тўпчи”га айланди. Англия чемпионати доирасидаги Манчестер дербисида “Юнайтед” ўз дарвозасидан 4та гол ўтказди ва бу бошланиши эди.

Ўзбек футболи: трагедия ва трагедия!

Ўзбек ишқибозларининг азалий ва асосий орзуси амалга ошмади. Бу трагедия! Сафардаги 1:1 фойдадир, лекин уйдаги бу ҳисоб трагедия. Бундан ташқари, пенальтилар сериясидаги трагедия ҳам юракларни ўртаб юборди. 9:10 ҳисоби — бу трагедия!

ОКТЯБРЬ

Жаҳон футболи: Блаттер — Месси мухлиси

“Эл-класико”да Алексис Санчеснинг голи “Барселона”га омад келтирди. ФИФА президенти Зепп Блаттер бир каналда интервью бера туриб, сирини бериб қўйди: “Менга Роналду ҳам, Месси ҳам ёқади. Лекин мен Месси мухлисиман”.

Ўзбек футболи: янги “эртак”нинг бошланиши

Миржалол Қосимов терма жамоа постидан кетмади. Кетмагани ҳам яхшиликкадир. Осиё кубоги-2015 учун янги қадамлар ташланди, таркиб ҳам бир қадар янгиланди. Вьетнам ва Гонконг таслим этилди, ОК-2015 йўлланмаси қўлга киритилди.

НОЯБРЬ

Жаҳон футболи: Иброҳимович – Роналду 2:3

ЖЧ-2014 плей-офф ўйинида Швеция ва Португалия ўртасидаги баҳс Златан ва Криштиану жангига айланиб кетди. Якунда эса Златан дублига Роналду хет-трик билан жавоб берди ва ЖЧ-2014 Златансиз ўтадиган бўлди.

Ўзбек футболи: Австралия-2015

Тошкентда нурсиз дуранг қайд этилганига қарамасдан, сафарда сўнгги дақиқаларда Австралия йўлланмаси қўлга киритилди.

ДЕКАБРЬ

Жаҳон футболи: кутилмаган ҳайратлар

Аввало, жаҳон чемпионатига қуръа ташланди. Ўлим гуруҳлари талайгина топилади. Қолаверса, “Наполи” ва “Ювентус” ЕЧЛдаги юришини тўхтатди. ЕЧЛ қуръасида эса “Манчестер Сити” – “Барселона”, “Бавария” – “Арсенал” каби финал олди финалларга гувоҳ бўламиз. Бундан ташқари, грандларни хафа қилишда давом этаётган гранд — “МС” “Арсенал” дарвозасига ҳам 6та гол киритди.

Ўзбек футболи: Денисов — энг яхши футболчи

23 декабрь, душанба куни “Зарафшон” кино-концерт залида Ўзбекистон Футбол Федерациясининг йил якунларига ва 2013 йил лауреатларини тақдирлашига бағишланган тантанали маросими бўлиб ўтди. Унда Виталий Денисов йилнинг энг яхши футболчиси деб топилди. Дилшод Нуралиев ва Аҳмаджон Мусаевга биттадан “Малибу” берилди. Бундан ташқари, Аббос Махсталиев “Ўзбекистон ифтихори” фахрий унвони, Игорь Сергеев “Ўзбекистон” белгиси” кўкрак нишони билан тақдирланди.

Мана, “Йил ҳайратлари” ҳам 2013 йил каби тугади. 2014 йилда барчамизга омад ва бахт кулиб боқсин. Соғликда кўришгунча!