Ҳожибой Тожибоев ҳаёт бўлганида... ёхуд "Миллион" ҳақида бир оғиз

“Ака-ука 3 метр деворни олиш учун судлашаётган экан. Орамизда оқибат, андиша йўқолиб кетяпти, азизлар...”

Бу “Миллион” жамоасининг (булар ҳалиям жамоами, ҚВЗ жамоасими, бошқача жамоа бўлиши мумкин эмас, футбол жамоасимасдир, ҳар сафар Миржалол Қосимовни “чайнаса”, футбол жамоаси бўлиб қолмайди-ку) 2014 йил баҳордаги концерти сўнгидаги гаплардан иқтибос. Шу концертни кўрдим, ҳам кулдим, ҳам куйдим. Кулганим — “Миллион”га қўшилиб нафақат ўша залдаги томошабинлар, балки олди қаторларни банд қилиб олган шоу-бизнес вакиллари устидан кулдим. Куйганим — Ўзбекистон халқ артисти Озодбек Назарбеков ва яна бошқа исталган санъаткорнинг ўша концертда ўтириб, саҳнадаги лўттибозларнинг, масхарабозларнинг, бачканабозларнинг қилиқларига маза қилиб кулганига ва энг ёмони, уларни шундайлигича қабул қилаётганига куйдим.

“Миллион” жамоасига ҳеч қандай адоватим йўқ. Бу болалар (“болларда айб йўқ”) ҚВЗдалик пайтида яхшироқ эди, майли, ўтган йилги илк концерти ҳам бундан дурустроқ эди. Лекин бу галгиси “Ошкора уятсизлик қиссаси” бўлиб кетибди. Улар ростдан ҳам масхарабозлик, бачканабозликка ўтиб кетишганини ўзлари исботлашибди. Чунки уятсизлик, беандишаликка йўғрилган кулги асло кулги ҳисобланмайди.

Марҳум Ҳожибой Тожибоевни эсланг, узоққа бормайлик. У халқ ичидаги гапларни айтарди, бўрттирмасди, қўшиб-чатмасди, шунчаки вазиятни тушунтирарди холос. Лекин буни одамларга етказиш маҳорати кучлилигидан уни 7 ёшдан 70 ёшгача ҳамма бирдек севарди, тингларди, томоша қиларди. “Миллион” концертини оилавий кўра оласизми? “Миллион” аъзоларининг ўзлари онаси билан бирга ўтириб, шу концертни кўра оладими? (Балки таклифнома билан концертнинг ўзига ҳам чақиришгандир.) Хўп, бирга кўрган тақдирда ҳам, концертни кўрган она (ёки опа, сингил, амма, хола, дада, амаки, қизи, ўғли) 90 фоиз тушунмаган жойларини ўзлари бирма-бир изоҳлаб берадими?

Тасаввур қила оласизми? Дейлик, йигирма иккинчи аср археологлари йигирма биринчи аср одамига дуч келган саҳна кўринишини олайлик.

“— Бу бўйдоқ экан.

— Қайдан билдинг?

— Қара, кафти шилиниб кетган...”

Шу ерида ҳамма кулади, тутқаноқ билан кулганлар ҳам топилади. Энди шу жойига тушунмаган онаси (ёки ёш синглиси, ёшгина қизи, ўғли) одамлар нима учун қотиб кулганига жавоб сўраса, нима деб жавоб беришаркан? Шунчаки қизиқ. “Арматура ташиган”, деб қутиладими? “Арматура ташиган”, деган гап бир неча дақиқадан кейин (одамлар “маза” қилиб кулиб бўлгандан сўнг) айтилади-ку ахир!

Бундай мисоллар тиқилиб ётибди, томошабин куляпти, энг ачинарлиси, залдаги эл хизматида юрган хонандалару актёрлар ҳам уларга жўр бўляпти. Нима, ҳамма шунчалик бачкана бўлиб кетганми? Ҳаёт шунчалик енгил-елпи, одамлар, ёшлар, ўша артистлар шу даражада енгилтакка айланганми? “Миллион”да йўқ экан, сизларнинг синглингиз борми, онангиз борми ёки бўйига етган қизингиз борми? Орият, номус, ҳамият, йигитлик ғурури борми сизларда? Майли, созандаларда бўлмаса, наҳотки бошқа томошабинларда ҳам бу каби тушунчалар етишмаса? Туринг ўрнингиздан, сўкиб ташланг, эътироз билдиринг, бақиринг, керак бўлса, тошбўрон қилинг! Бу халқни нима кўйга соляпти ахир улар!

Ҳар замонда чироқ ва футбол муаммосини орага тиқиштириб кетиб, халқдан оламиз, дейишдан уялмайди улар. Чунки уларнинг иши шу, нони шу! Уларнинг сизларга ўхшаган, бармоғини ҳам кўрсатса, “думалаб” куладиган “мухлислари” бор! Улар гапга уста, хоҳласа, Жасур Умировни саҳнага ўтказиб қўйиб, унинг обрўсини ер билан битта қилади. Истаса, Умида Мирҳамидовадек устоз хонандаларни калака қилади. Нима, уларнинг ўрнида ўша Озодбек Назарбеков бўлиши мумкинмасми? Мумкинмас, ҳозирча. Чунки ҳозирча ундан ҳайиқишади. Балки маълум вақтдан кейин уни ҳам “михга ўтирғизиб юборишар”. Агар унгача ўзлари бошқа жойларга ўтириб кетишмаса. Улар хоҳлаган одамининг устидан хоҳлаганича кулиши мумкин, чунки улар гап билан туғилган. Уларнинг устидан ким кулади? Ҳамтовоғи “Дизайн”ми? Ким?!

Уларни тартибга соладиган одам фақат битта эди, у ҳам бўлса орамизда йўқ. Агар орамизда бўлганида “Дизайн”, “Миллион” деган бачкана компаниячалар ҳам бўлмасди... Агар Ҳожибой Тожибоев ҳаёт бўлганида уларга нон топилмасди (марҳум бир йилда икки марта концерт беришга ўтганди). Агар Ҳожибой Тожибоев тирик бўлганидами... буларни кўриб, қизиқчиликдан воз кечарди. Бундай томошабинга мавзу тополмаганидан узлатга чекинарди...